Wednesday 17 September 2014
Home / News / Man in Durbanville-polisieselle doodgeskop

’n Man van Bellville is glo Saterdag in die Durbanville-polisieselle doodgeskop nadat hy weens openbare dronkenskap opgesluit is.

Mnr. Eben Meyer (47) van Bellville is glo omstreeks 01:30 deur twee mans in die selle aangerand. Hy is na bewering herhaaldelik geskop en geslaan en het ernstige kopbeserings opgedoen.

Meyer het volgens sy familie by die Stones-kroeg in Durbanville gekuier nadat hy glo ’n rusie met sy verloofde, me. Sylvia Hamman, gehad het.

Die polisie het Meyer Saterdag om 01:00 in Renbaanweg, Durbanville, opgelaai en na die polisiekantoor geneem weens openbare dronkenskap. Hy is volgens die polisie saam met agt ander mense wat ook onder die invloed was, in ’n sel aangehou.

Lt.kol. Andre Traut, ’n provinsiale polisiewoordvoerder, het die voorval bevestig en gesê die twee mans verskyn môre in die Bellville-landdroshof op aanklagte van moord.

“Hy is in die selle aangerand en het weens sy beserings beswyk. Hy is Saterdagoggend vir openbare dronkenskap in hegtenis geneem. Dit blyk hy en die twee mans was in ’n rusie betrokke, wat tot die bakleiery aanleiding gegee het,” het Traut gesê.

Die Onafhanklike Polisie-ondersoekende Direktoraat (Opod) ondersoek ook die voorval. Mnr. Moses Dlamini, Opod-woordvoerder, kon egter nie vir kommentaar bereik word nie.

Meyer se pa, mnr. Brian Meyer van Saldanha, het gister vertel hy het om 02:05 ’n oproep van die polisie ontvang om te sê sy seun is in die polisieselle dood.

“Ek was geskok toe ek dit gehoor het. Ek kon nie verder praat nie.

“Hy het voorheen ’n drankprobleem gehad, maar hy was die afgelope paar maande nugter,” het sy pa gesê.

Die familie sal vandag sy lyk in die staatslykshuis by die Tygerberg-hospitaal gaan uitken. Daar is nog geen begrafnisreëlings nie.

Sy oudste dogter, Naomi (24), het gister met trane in haar oë vertel hulle is in die duister oor die gebeure.

“Die polisie moes seker gehoor het toe hulle my pa aangerand het. Hoe kan dit wees dat niemand gehoor het nie? Niemand het hom gehelp nie.”

Die familie het reeds berading gekry.

Meyer laat buiten sy verloofde en oudste dogter ook twee ander dogters, Sonika (22) en Inge (17), agter. Hy het ook ’n kleinseun, Marko (2).

- Die Burger

  COMMENTS 
 
top
OUR LATEST ISSUE

top
bottom