In ’n uiters taai en spanningvolle kragmeting het HS Tygerberg se o.19A-netbalspan D.F. Malan in die jongste reeks eersteliga-wedstryde in die WP met 31-27 geklop.

Die Tiere het van meet af aan die voortou geneem en in ’n stadium ’n voorsprong van ses doele opgebou. Teen die einde het die Bellvilliete mooi teruggeveg, maar die besoekers se voorsprong was net te groot om uit te wis.

Tygerberg se oorwinning kan toegeskryf word aan ’n puik spanpoging waarmee die tuisspan gereeld op die agtervoet gedwing is. Daarby het die Tiere deeglik munt geslaan uit DFM se foute.

Tygerberg se doelskieters, Xenia Fölscher en Nadia Roelofse, was mooi op dreef terwyl Janine Wagenstroom in die senterbaan uitgeblink het. Vir die tuisspan het Lara Pretorius en Lezahn Mentz die beste vertoon.

DFM se ander spanne het darem veel beter gevaar en oorwinnings is behaal deur die o.19B (24-16), o.16A (32-13) sowel as die o.14A (19-14).